काठमाडौं – यतिबेला निर्माणका क्रममा रहेको फिल्म ‘मारुनी’ को चर्चा भइरहेको छ । चलचित्रमा पुष्प खड्का र साम्राज्ञी राज्यलक्ष्मी शाहको जोडी देख्न सकिनेछ । साम्राज्ञीका कारण पनि फिल्मको राम्रै चर्चा भइरहेको छ । साम्राज्ञीले ‘मारुनी’ को सेटबाट छायांकनका तस्वीर शेयर गरिरहेकी हुन्थिन् ।

यता अभिनेता पुष्प खड्का भने फिल्मका बारेमा सामाजिक सञ्जालमा त्यति शेयर गरेका हुँदैनन् । तर, खबरहबको कुराकानीसँग उनले यो फिल्मबाट आफूले निकै राम्रो प्रतिक्रिया पाएको र काम पनि आफूलाई चित्तबुझ्दो भएको बताएका थिए । हालै उनी अभिनित फिल्म ‘दाल भात तरकारी’ प्रदर्शनमा आएको थियो । तर, सो फिल्मबाट उनले खासै प्रतिक्रिया पाउन सकेनन् । उनले सो फिल्मबाट घाटा पनि नभएको बताएका थिए ।

चलचित्र ‘मारुनी’ बाट भने उनी आशावादी छन् । फिल्म निर्माण टिम उनको अभिनयको तारिफ गर्छ । यसअघि चलचित्र ‘मंगलम्’ मा अभिनय गरेर प्रशंसा पाएका पुष्पले फिल्म ‘दर्पण छाया २’ बाट भने खासै प्रतिक्रिया पाउन सकेका थिएनन् ।

म्युजिक भिडियोमा राम्रै जमेका पुष्प पछिल्लो समय राम्रै जमेका अभिनेतामा पर्छन् । फिल्ममा खासै जम्न नसकेका पुष्पले यो फिल्मबाट तारिफ पाउनेछन् भन्नेमा धेरैले आशा गरेका छन् ।