काठमाडौं – चलचित्र ‘ए मेरो हजुर ३’ को ‘राधे कृष्ण’ गीत युट्युबमा रिलिज गरिएको छ । फिल्ममा समावेश यो गीतमा झरना थापाकी छोरी सुहाना थापालाई कृष्ण भक्तका रुपमा देखाइएको छ ।

गीतमा प्रतीक पौडेलको संगीत र शब्द सुन्न सकिन्छ भने प्रविशा अधिकारी र सुरज लामाले स्वर दिएका छन् । यस्तै भिडियोमा कविराज गहतराजको कोरियोग्राफी देख्न सकिन्छ ।

सुनीलकुमार थापाले निर्माण गरेको यो फिल्ममा अनमोल केसी र सुहाना थापाको जोडी रहेको छ । फिल्ममा सुहाना र अनमोलले आर्या र प्रेमको भूमिकामा अभिनय गरेका छन् । सुहानाका लागि यो डेब्यु फिल्म हो भने उनले अभिनयका कारण चर्चा पाएकी छिन् ।

यसैबीच यो फिल्मले आजसम्म झण्डै दश करोड कमाइ गरेको बताइएको छ । स्रोतका अनुसार यो फिल्मले नेपालबाट मात्र ९ करोड ६३ लाखको ग्रस कलेक्सन गरेको छ । पछिल्लो समय फिल्म व्यावसायिक रुपमा असफल रहेका बेला  फिल्मले उच्च व्यापार गरेको थियो । ‘ए मेरो हजुर ३’ ले व्यावसायिक सफलता पाए पनि समीक्षकबाट भने तारिफ पाउन सकेन ।