बुटवल– लुम्बिनी प्रदेश योजना आयोगले १० जना विद्यार्थीलाई एक–एक लाख रुपैयाँको शोधवृत्ति प्रदान गरेको छ ।

गत वर्षदेखि प्रदान गर्न थालेको शोधवृत्ति यसवर्ष कृषि तथा वन विज्ञान विश्वविद्यालय रामपुर चितवनका मनोज बस्नेत र सन्दिप अर्याल, अमृत साइन्स क्याम्पसका नमुना पौडेल, अजयकुमार बजगाईं र निरा चण्डी, त्रिभुवन विश्वविद्यालय एक्वा कल्चर विभागका गणेश बेल्बासेलाई दिइएको हो ।

त्यस्तै, कृषि तथा पशु विज्ञान अध्ययन संस्थानकी बाला शर्मा, लुम्बिनी बौद्ध विश्वविद्यालयका प्रशन्न घिमिरे, नेपाल खुला विश्व विद्यालयका खिमानन्द भण्डारी र वीपी कोइराला स्वास्थ्य विज्ञान प्रतिष्ठानका सुनिता खरेलले शोधवृत्ति प्राप्त गरेका छन् । प्रदेशभित्रका आर्थिक, सामाजिक लगायत २९ वटा विषयमा शोध गर्न मिल्ने गरी आयोगले प्रस्ताव आह्वान गरे अनुसार छनोट भएका उत्कृष्ट १० जनालाई शोधवृत्ति प्रदान गरेको हो ।

आयोगले आह्वान गरेको प्रस्ताव अनुसार विभिन्न विश्वविद्यालयका ३१ वटा प्रस्तावमा प्रतिस्पर्धा भएको थियो । आयोगमा आएका शोध प्रस्तावको मूल्यांकन गर्न ५ सदस्यीय विज्ञ समूह गठन भएको र उत्कृष्ट १० जनालाई छनोट गरिएको प्रदेश योजना आयोगका सदस्य डा.दामोदर भुसालले बताए ।

योजना आयोगको यो कार्यक्रमले विश्वविद्यालयका विद्यार्थीहरुलाई प्रोत्साहन हुनुका साथै प्रदेशका संभावनाको खोजी, योजना, कार्यक्रम र बजेट निर्माणमा टेवा पुग्ने आयोगका उपाध्यक्ष वामदेव क्षेत्रीले बताए ।