काठमाडौँ– राष्ट्रिय ट्रमा सेन्टरका ५२ जना स्वास्थ्यकर्मीमा कोरोना संक्रमण देखिएको छ । केही दिन यता गरिएको परीक्षणमा ५२ जना चिकित्सक, नर्स, प्यारामेडिक्स, प्रयोगशालाकर्मीमा संक्रमण पुष्टि भएको ट्रमाका निर्देशक डा. प्रमोद जोशीले बताए ।

ट्रमाको आइसीयू युनिटका ७ जना, ल्याबका ७ जना, फिजियोका ६ जना, वार्डहरुमा कार्यरत १० जनालगायत प्रशासन र अन्य विभागका गरी आजसम्म संक्रमितको संख्या ५२ पुगेको हो । डा. जोशीले संक्रमित सबैजना होम आइसोलेसनमा रहेको जानकारी दिए ।

‘कन्सलटेन्ट डाक्टर, रेजिडेन्ट डक्टर, नर्स तथा अन्य प्यारामेडिक्स तथा कर्मचारीसमेत संक्रमित भएकाले व्यवस्थापन गर्न गाह्रो छ,’ उनले भने ।

यस्तै, ट्रमासेन्टरले डा. समाज गौतमको संयोजकत्वमा कोभिड १९ रेस्पोन्स टिम गठन गरेको छ । ‘कोभिडको नयाँ भेरियन्टले सिर्जना गरेको तेस्रो लहरमा कसरी जुधेर अघि बढ्ने भन्ने विषयमा यो टिमले काम गर्ने छ,’ डा जोशीले भने ।