जाडो मौसममा मौसमी फ्लु, रुघाखोकी, निमोनिया जस्ता समस्याहरूले बढी सताउने गर्दछ । कोरोना भाइरसको सङ्क्रमणले समेत निमोनिया गराउन सक्छ । थोरै निमोनियामा मात्रै सङ्क्रमितको फोक्सोमा गम्भीर असर पुग्ने गर्छ र कतिपयको त ज्यानै पनि जाने हुन्छ ।
निमोनिया भनेको मुख्यतः फोक्सोसँग सम्बन्धित समस्या हो । यो समस्यामा एउटा वा दुइटै फोक्सोमा सङ्क्रमण हुने गर्छ । यस्तो सङ्क्रमण भाइरस, ब्याक्टेरिया वा ढुसीका कारणले हुने गर्छ । जुनसुकै कारणले भए पनि निमोनियाको सङ्क्रमण भएपछि फोक्सोको हावा थैलीहरू सुन्निने हुन्छ र बेलैमा उपचार भएन भने त्यहाँ पानी वा पीप भरिन थाल्छ । यस्तो अवस्थामा सङ्क्रमितलाई सास फेर्न अप्ठेरो हुन्छ ।
निमोनियाका लक्षण :
– सामान्यतः खकार आउने खोकी लाग्ने ।
– ज्वरो आउने ।
– चिटचिट पसिना आउने ।
– सास फेर्न गाह्रो हुने ।
– छातीमा पीडा हुने (खोक्दा वा सास फेर्दा यो पीडा झनै बढेर जाने) हुन्छ।
– गलेको महसुस हुने, थकाइ लाग्ने ।
– खानामा अरुची हुने ।
– वाकवाक लाग्ने वा वान्ता हुने ।
– टाउको दुख्ने ।
उमेर अनुसारका फरक लक्षण :
– ५ वर्षभन्दा मुनिका बच्चाहरूमा छिटो-छिटो सास फेर्ने र स्वाँस्वाँ हुने ।
– शिशुमा लक्षण नदेखिने तर वान्ता हुने ।
– फुर्ति नहुने र खान वा पिउन नमान्ने ।
– वृद्ध उमेरमा शरीरको तापक्रम कम हुने वा भ्रमित हुने लगायतका मध्यमखालका लक्षणहरू देखा पर्न सक्छ ।
निमोनियाका लक्षणहरू सामान्यदेखि जीवनलाई नै खतरामा पार्नेसम्मको हुन सक्छ । त्यसैले यसको उपचारमा ढिलाइ गर्नु हुँदैन। लक्षण देखिनासाथ तत्काल अस्पताल जाने वा चिकित्सकको परामर्श लिनु पर्दछ । निमोनियालाई हल्का रुपमा लिनु हुँदैन ।
प्रतिक्रिया