काठमाडौं– एक समय नेपाली फिल्ममा खलपात्रको भूमिकामा अभिनय गरेका अभिनेता पुष्कर भट्टले ‘जिल्ला मुरादाबाद’ नामक हिन्दी गीत र वेब सिरिजको निर्माण गरेका छन् ।

केही वर्षयता क्यानडालाई कर्मथलो बनाउँदै आएका पुष्करले गायक प्रिन्स आनन्दको स्वर र शब्द तथा द किंगले संगीत भरेको यो गीतको भिडियो निर्देशन गरेका हुन् । राजनीतिक दाउपेचको कथा उठाइएको भिडियोमा पुष्कर भिलेन भूमिकामा छन् । भिडियोमा सुखविंदर सिंह जसल, जगदीप बावा, परम हंस, गुलकरण सिंह र सलमान काजमीको पनि अभिनय छ ।

ओटीटी प्लेटफर्म अमेजन प्राइममा रिलिज हुने वेब सिरिजमा पुष्करकै निर्देशन छ भने प्रमुख भिलेनमा पनि उनी आफैं छन् । वेब सिरिज पाँच भागको छ । पुष्करका अनुसार क्यानडामै छायांकन गरिएको वेब सिरिजको सम्पादन काम गरेर अमेजनलाई पठाउने तयारी भइरहेको छ ।

वेब सिरिजमा ‘जिल्ला मुरादाबाद’ गीतका गायक प्रिन्स आनन्दले प्रमुख नायकको भूमिका निर्वाह गरेका छन् । सिरिजका निर्माता पनि उनै हुन् । पुष्करले ‘भागी भागी नजाउ’, ‘अग्नी ज्वाला’, ‘गंगाजल’, ‘बाटुली’, ‘दोस्ती’, ‘फैसला’, ‘हिम्मतवाली’लगायत सय बढी नेपाली फिल्ममा र दुई दर्जन भोजपुरी फिल्ममा अभिनय गरेका छन् ।