काठमाडौं– यही शुक्रबारबाट देशव्यापी प्रदर्शनमा आउन लागेको हरर जनरामा निर्मित फिल्म ‘कठपुतली’को बुधबार काठमाडौंको कमलपोखरीस्थित बिग मुभिजमा प्रिमियर गरिएको छ । फिल्म हेरेपछि फिल्मकर्मीले कलाकारको अभिनय, निर्देशन, स्क्रिनप्ले, छायांकन, साउन्ड डिजाइन, लाइटिङ, फ्रेमिङ र सम्पादनको प्रशंसा गरे ।

निर्माता तथा निर्देशक आकाश अधिकारीले फिल्मको पटकथा राम्रो रहेकाले दर्शकलाई फिल्मे बाँध्ने बताए । अर्का निर्देशक प्रदीप भट्टराईले फिल्मको साउन्ड, लाइटिङ, प्रोडक्सन, कस्ट्यूम, अभिनयको कुराले फिल्म बलियो बनेको जनाए । उनले फिल्ममा उठाइएको महिला सशक्तिकरणको कुराले फिल्म हेर्न लायक बनेको दाबी गरे ।

अभिनेत्री तथा निर्मात्री निशा अधिकारीले फिल्ममा पहिलो पटक स्वदेशी भूत हेर्न पाएकोमा खुसी व्यक्त गरिन् ।

भीमसेन लामा निर्देशित फिल्म मिथिला शर्मा, कर्मा र उषा रजकमाथि केन्द्रित छ । पिताको गलत निर्णयले ढल्ने अवस्थामा पुगेको राजतन्त्रलाई जोगाउन निस्किएको राजकुमारको जीवनमा आउने विभिन्न घटनाक्रमलाई देखाइएको फिल्ममा मिथिला शर्माको अभिनय बुलन्द छ । फिल्ममा गौरी मल्ल र शिल्पा मास्केको पनि अभिनय छ ।