टोकियो(अमर उजाला)– ‘आइडली प्राइड’, ‘स्टार ब्लेजर्स २२०२’ र ‘कन्वीनियन्स स्टोर ब्वाइफ्रेण्ड्स’ जस्ता सिरिजमा भ्वाइस ओभर गरेकी जापानी अभिनेत्री सयाका काण्डाको निधन भएको छ । उनको आधिकारिक वेबसाइटले उनको निधनको पुष्टि गरेको छ । उनी ३५ वर्षकी थिइन् ।

समाचारअनुसार उनी आफू बसेको होटलको २२ औं तलाबाट खसेकी थिइन् । प्रहरीले अभिनेत्रीको मृत्युलाई आत्महत्या भने पनि यसलाई शंकाको घेरामा राखेको छ ।

सयाकाको सम्पर्क कार्यालयले विज्ञप्ती जारी गर्दै अभिनेत्री गम्भीर दुर्घटनाको शिकार भएको दाबी गरेको छ । सयाकाको डिसेम्बर १८ को बेलुका निधन भएको थियो ।

सयाका होटल बाहिर बेहोस अवस्थामा भेटिएकी थिइन् । प्रत्यक्षदर्शीका अनुसार उनको शरीर रगतले भिजेको थियो । उनलाई अस्पताल लगिए पनि उनको निधन भइसकेको थियो । प्रहरीले अभिनेत्रीको मृत्युलाई आत्महत्या भने पनि सयाकाका साथीहरु यसलाई आत्महत्या मान्दैनन् ।