काठमाडौं–पर्यटन प्रवर्द्धनसँगै नेपाली फिल्मलाई ग्रामीण बजारमा पुर्याउने उद्देश्यका साथ सेलिब्रेटी नेपालले माघको अन्तिम साता तीन दिवसीय ‘नेपाल ग्रामीण चलचित्र महोत्सव’ आयोजना गर्ने भएको छ ।

महोत्सवका अध्यक्ष रघुनाथ सापकोटाले गाउँले परिवेशमा निर्माण गरिएका स्वदेशी सर्ट फिल्म, डकुमेन्ट्री र फिचर फिल्मलाई महोत्सवमा सहभागी गराउदै ग्रामीण दर्शकमाझ अत्याधुनिक प्रविधिमा स्क्रिनिङ गर्ने र उत्कृष्ट फिल्मलाई अवार्ड दिइने बताए ।

महोत्सवमा भाषागत फिल्मसँगै मोबाइलबाट खिचिएका फिल्महरुसमेत प्रदर्शन गरिनेछन् । यसबाहेक ग्रामीण परिवेशलाई समेटेर कस्ता फिल्म बनाउन सकिन्छ भन्ने विषयमा पनि अन्तरक्रिया हुनेछ ।

‘महोत्सवमा प्रदर्शन गरिएका फिल्मसँग सम्बन्धित फिल्मकर्मी तथा आम दर्शकबीच अन्तरक्रिया गरिने, गाउँले परिवेशमा फिल्म बनाउने बिषयमा वर्कशप तथा मास्टर क्लासलगायतका कार्यक्रम छन्’, सापकोटाले भने ।