काठमाडौँ- नेपाली कांग्रेसको १४ औं महाधिवशेन अन्तर्गत हालसम्म करिब डेढ लाख पदमा नयाँ नेतृत्व चयन भएको छ ।

वडा, पालिका, प्रदेशसभा क्षेत्र र प्रतिनिधिसभा क्षेत्र र जिल्ला तथा क्षेत्रीय, प्रदेश र केन्द्रीय महाधिवेशन प्रतिनिधिसमेत गरी अहिलेसम्म डेढ लाख पदमा नेतृत्व चयनको काम पुरा भएको कांग्रेसका प्रवक्ता विश्वप्रकाश शर्माले बताए ।

उनका अनुसार तीमध्ये ९४ प्रतिशत पदमा सर्वसम्मतबाट नेतृत्व चयन भएको छ । ६ प्रतिशत पदमा चुनावी प्रतिस्पर्धाबाट नेतृत्व चयन गरिएको छ । यो संख्या अझै बढेर जाने उनले बताए ।

हालसम्म १ लाख ४१ हजार ४२ पदमा सर्वसम्मतबाट र ८ हजार ४७४ पदमा चुनावी प्रतिस्प्रर्धाबाट नयाँ नेतृत्व चयन भएको उनले बताए । नेतृत्वमा पुगेकामध्ये ६८ हजार ८३२ जना खसआर्य समुदायका छन् भने थारु समुदायबाट ५ हजार ८ सय २७ जना नेतृत्वमा आएका छन् ।

यसैगरी अपांगता भएका १ हजार ८ सय ६४ जना, आदिवासी तथा जनजाति समुदायका ४१ हजार २ सय ५६ जना रहेको उनले बताए ।

त्यस्तै ४३ हजार ३५७ जना महिलाहरु पनि नेतृत्वमा पुगेका छन् ।