काठमाडौँ– नेपाल बार एसोसिएसनले जिल्ला, उच्च र विशेष अदालतको नियमावली तत्काल संशोधन गर्नुपर्ने माग गरेको छ । सोमवार बसेको बारको कार्यसमितिको बैठकले उक्त माग गरेको हो ।

सर्वोच्च अदालतले नै गत साउन १७ गते जिल्ला, उच्च र विषेश अदालतलाई पत्रचार गरी २०७८ मंसिर १ गतेबाट गोला प्रणालीमार्फत पेशी तोक्ने भनेको तर अहिले सो अनुरुप नगरी सर्वोच्च अदालतको नियमावली मात्रै संशोधन भएकाले अन्य अदालतको पनि नियमावली संशोधन हुनुपर्ने माग बारले राखेको छ ।

पूर्वप्रतिवद्धता कार्यान्वयन गर्न बारले फुलकोर्टलाई माग गरेको हो । जिल्ला, उच्च र विषेश अदालतको नियमावली संशोधन नभएसम्म जिल्ला, उच्च र विषेश अदालतमा दैनिक १ घण्टा धर्ना दिने बारले जनाएको छ ।

त्यस्तै सर्वोच्च अदालतमा बुधावारदेखि लागु हुने गोला प्रणालीमा प्रधानन्यायाधीश चोलेन्द्र शम्शेर जबरालाई सहभागी नगराउन पनि बारले माग गरेको छ । प्रधानन्यायाधीश जबराको इजलासमा नबस्न न्यायाधीशहरुलाई बारले आग्रह गरेको छ ।