हरेक बेरोजगार व्यक्तिलाई थाहा छ, बेरोजगारी कति दुःखदायी हुन्छ । जागिर पाउन बेरोजगार व्यक्ति अनेकौँ मेहनत गर्दछन् । तथापि सहजै रोजगारी हात लाग्दैन । यस्तोमा आफ्नो सोच र सपना अनुसारको जागिर सजिलै पाइए के होला ?

बेलायतको लन्डन निवासी २४ वर्षीय हैदर मलिक बेरोजगार थिए । उनले जागिरको खोजीमा धेरै समय खर्चे । जूम कल मार्फत कैयौँ अन्तर्वार्ता पनि दिए । तर भनेजस्तो जागिर पाएनन् । अन्ततः मलिकले जागिर पाउन एउटा उपाय निकाले । उनले एक बोर्डमा आफ्नो बायोडाटा बोकेर मेट्रो स्टेसन पुगे ।

उनको यो अनौठो उपायका कारण केवल ३ घण्टामा नै ती युवकले जागिर पाए । उनको यो उपायले उनलाई केवल जागिर मात्र दिलाएन उनी सामाजिक सञ्जालमा समेत भाइरल हुँदै विश्वभर चर्चित बने । अहिले ती युवकको प्रसङ्गले धेरैलाई प्रेरणा र हौसला मिलेको छ ।

७ बजे मेट्रो पुगेका मलिकलाई जागिरको अफरसहित धेरै फोन र म्यासेज आए । ९ बजेर ३० मिनेटमा उनले थप एक म्यासेज पाए । यो म्यासेज कैनरी व्हार्फ ग्रुपको ट्रेजरी एनालिस्टको पदका लागि थियो । उनी सो अफर स्विकार्दै अन्तर्वार्ता दिन पुगे र जागिर पाए ।

मलिकका अनुसार जागिर खोज्ने यो अनौठो उपाय उनलाई पिता महमूद मलिकबाट प्राप्त भएको थियो । उनका पिता सानैम पाकिस्तानबाट बेलायत आएका थिए ।