काठमाडौँ– बलात्कार आरोपमा थुनामा रहेका चिनियाँ नागरिक लिउ यूलाई छुटाइदिन्छु भन्दै रकम उठाउने एक महिला पक्राउ परेकी छन् ।

गत असार १८ गते ठमेलमा एक नाबालिकालाई बलात्कार गरेको अभियोगमा चिनियाँ नागरिक पक्राउ परेका थिए । ती चिनियाँ नागरिककी श्रीमती नेपाली हुन् । उनकी श्रीमती कमला भुसाल सहयोग खोजिरहेकी थिइन् । उनलाई काभ्रेकी रविना थापाले पैसा खर्च गरे छुटाउन सकिने विश्वास दिलाइन् । रबिनाले कमलालाई मञ्जु ओलीसँग भेटाइदिइन् ।

उनीहरुले आफ्ना मान्छे वकिल छन्, उनले न्यायाधीश चिनेकाले सेटिङ मिलाइदिन्छु भनेर कमलाबाट २० लाख रुपैयाँ लिएको प्रहरीले जनाएको छ ।

२० लाख रुपैयाँ दिए पनि आफ्ना श्रीमान नछुटेपछि उनी प्रहरीमा ठगी उजुरी लिएर पुगिन् । प्रहरीले पीडितकै सहयोगमा रबिनालाई पक्राउ गरेको छ। ओली फरार छिन् । उनीविरुद्ध ठगी सम्बन्धी कसूरमा म्याद थप भएर काठमाडौं प्रहरी परिसर, टेकुबाट विस्तृत अनुसन्धान भइरहेको छ ।