मुम्बई(अमर उजाला)– भारतीय गायिका लता मंगेशकरको गीत ‘एक प्यार का नगमा है’ गाएर रातारात स्टार बनेकी रानु मण्डलको अवस्था अहिले फेरिएको छ । संगीतकार तथा गायक हिमेश रेशमियासँग गीत गाएकी रानूले बंगलादेशी स्टार हीरो अलोमले निर्माण गर्ने दुई गीतमा गाउने अवसर पाएकी छन् ।

बंगलादेशी स्टार हीरोले सामाजिक सञ्जालमार्फत यो कुराको पुष्टि गरेका छन् । यो खबर सार्वजनिक भएसँगै सामाजिक सञ्जालमा सकारात्मक र नकारात्मक प्रतिक्रिया आइरहेका छन् । केहीले रानु पुनः चर्चामा आउने बताइरहँदा केहीले भने उनलाई ट्रोल गर्ने योजना खुलाएका छन् ।

रानुलाई बलिउडमा पहिलो मौका हिमेशले नै दिएका थिए । उनले आफ्नो फिल्म ‘हेप्पी, हार्डी और हीर’मा दुई गीत गाउने अवसर दिएका थिए । फिल्ममा रानूले ‘आशिकी में तेरी’, ‘तेरी मेरी कहानी’ गाएका थिए । यो गीतका लागि उनले लाखौं रुपैंयाँ पारिश्रमिक लिएकी थिइन् । तर रानूले यो लोकप्रियतालाई लामो समय सम्हाल्न पाइनन् ।

फिल्मपछि उनलाई स्टेज शो र फेसन शोसम्मको अफर गरिएको थियो । जहाँ उनको व्यवहारका कारण ट्रोल हुनु परेको थियो । सन् २०१९ मा एक भिडियो सामाजिक सञ्जालमा निकै भाइरल भइरहेको थियो । भिडियोमा लता मंगेशकरको गीत ‘एक प्यारका नगमा है’ गाएर एक महिला पैसा मागिरहेकी थिइन् । ती महिला रानु नै थिइन् । भिडियो सार्वजनिक हुनासाथ उनी रातारात इन्टरनेट सेन्सेसन बनिन् ।