काठमाडौं– लोकसेवा आयोगले आगामी जेठ १५ मा पहिलो चरणअन्तर्गत ८ हजार पदमा कर्मचारी भर्नाका लागि बिज्ञापन आह्वान गर्ने भएको छ । आयोगले लामो अन्योल चिर्दै ठूलो संख्यामा कर्मचारी भर्नाको नयाँ प्रक्रिया थालेको हो ।

आयोगले स्थानीय तहका लागि कर्मचारी भर्ना प्रक्रियाको कार्यतालिका सार्वजनिक गर्दै भर्ना खुलाउने औपचारिक घोषणा गरेको हो । आयोगले बिहीवार स्थानीय तहका पदको पदपूर्तिसम्बन्धी विशेष कार्यतालिका सार्वजनिक गर्दै जेठको तेस्रो बुधबार खुल्लातर्फको पदपूर्तिको बिज्ञापन आह्वान गरिने जानकारी दिएको छ ।

कार्यतालिका अनुसार चौथो, पाचौं, छैटौं र नवौं तहसम्मका बिभिन्न प्राविधिक तथा अप्राविधिक पद खुल्ला प्रतिस्पर्धाका लागि बिज्ञापन आह्वान आयोगका प्रवत्ता किरणराज शर्माले जनाएका छन् ।

हाल खुल्ला प्रतिस्पर्धाका आधारमा लिइने पदका लागि मात्रै विज्ञापन गर्न लागिएको उनले बताएका छन् । आन्तरिक प्र्रतिस्पर्धाका लागि भने छिट्टै अर्को प्रक्रिया शुरु गर्ने आयोगको तयारी रहेको छ । खुला प्रतिस्पर्धाका लागि झण्डै ८ हजारको संख्या विज्ञापन हुने आयोगको आकलन छ ।