नेपोलियन आफ्ना सेना अल्पस पर्वतको बाटोबाट लिएर जान चाहन्थे र बाटो खोज्नको लागि उनी आफै पहाडको बेंशीमा आएका थिए । त्यहाँ एउटी वृद्धा थिइन् । नेपोलियनले उनीसँग बाटोको बारेमा जानकारी लिनको लागि कुरा गर्न थाले तब ती वृद्धाले भनिन्— मूर्ख तिमी जस्ता धेरै मूर्खले यो दुर्गम पहाड चढ्ने प्रयासमा आफ्नो ज्यान गुमाएका छन् । विनाकारण मर्नुको कुनै फाइदा छैन । फर्केर जाउ ।

नेपोलियन मुस्कुराए र भने, आमा राम्रो भयो कि तपाईंले मलाई कठिनाइको बारेमा सतर्क गराउनुभयो । यसले मेरो हौसला अझ बढ्यो र धेरै बुद्धिमानीले काम लिन मैले पाठ सिकेँ । तपाईंको कृपाले म यो पहाड एक दिन अवश्य पार गरेरै छोड्छु ।

वृद्धा दङ्ग भइन् र सोचिन्, खतरालाई यस्तो चुनौती दिने मानिस कुनै साधारण व्यक्ति हुनसक्दैन । उनले आशीर्वाद दिइन् र भनिन्, साहसी मानिसको लागि यो संसारमा कुनै काम असम्भव हुँदैन ।

नेपोलियन अल्पस पर्वत पार गर्नमा सफल भए । तर उनले ती वृद्धाको यो संवाद समय समयमा याद गरिरहे, साहसी मानिसको लागि संसारमा कुनै काम असम्भव हुँदैन ।
साभारः ‘प्रेरक प्रसङ्हरु’ पुस्तकबाट