काबुल– अफगानिस्तानमा चरम भोकमरी भएको छ । तालिबानले अफगानिस्तानको सत्ता हातमा लिएपछि अन्तर्राष्ट्रिय सहयोग बन्द भएको छ । अन्तर्राष्ट्रिय सहयोग बन्द भएको र विभिन्न विदेशी बैंकमा रहेको अफगानिस्तानको सम्पत्ति रोक्का भएका कारण त्यहाँ चरम आर्थिक संकटसमेत निम्तिएको छ ।

बीबीसीले एक भिडियो रिपोर्ट प्रशारण गर्दै आर्थिक अभावकै कारण एक दम्पत्तिले आफ्नी नाबालक छोरी बेचेको जनाएको छ । बीबीसीसँग ती बालिकाकी आमाले पैसाको अभाव भएपछि आफ्नी छोरी बेचेको बताएकी छन् । पहिचान लुकाइएका उनीहरुले छोरी बेच्नु बाध्यता भएको बताएका छन् ।

ती बालिकालाई खरिद गर्ने व्यक्तिले भविष्यमा आफ्ना छोरासँग बिहे गर्ने बताएका छन् । तर बालिकाका बाबुले छोरीको भविष्यबारे अहिले केही भन्न नसकिने बताएका छन् ।

बीबीसीले अफगानिस्तानको हेरत प्रान्तको एक अस्पतालको दर्दनाक भिडियोसमेत प्रशारण गरेको छ । सो अस्पतालमा कुपोषण भएका सयौँ बालबालिका भर्ना गरिएका छन् । सो अस्पतालका चिकित्सक तथा नर्सहरुले विगत ४ महिनादेखि तलब नपाएको जनाइएको छ । अफगानिस्तानको स्वास्थ्य संरचना ध्वस्त भएको छ । एजेन्सी