काठमाडौं – कलाकार प्रियंका कार्की यतिबेला फ्रान्समा छिन् । कान्समा जारी ‘कान्स फिल्म फेस्टिभल २०१९’ को रेक कार्पेटमा हिँड्न कान्स पुगेकी प्रियंकाले रेड कार्पेटमा नहिँड्दै धारावाहिक तस्वीर शेयर गरिरहेकी छिन् । तर, अचम्मको कुरा के छ भने प्रियंकाले अपलोड गरेका ती तस्वीरको पोशाक बलिउड कलाकार प्रियंका चोपडाले लगाएको पोशाकसँग मिल्दोजुल्दो छ ।

यतिसम्म कि, प्रियंका चोपडाले लगाएकै पोशाकको मात्र हैन, प्रियंका कार्कीले चोपडाका ‘पोज’ लाई पनि कपी गरेकी छिन् । फ्रान्स उड्ने बेला विमानस्थलमा बोल्दै कार्कीले नेपाललाई चिनाउने प्रयास गर्ने बताएकी थिइन् । तर, पुग्नासाथ प्रियंका चोपडाको स्टाइल चोरेको भन्दै कतिपयले आक्रोश व्यक्त गरेका छन् ।

यति मात्र होइन, प्रिय‌ंकाले अर्की बलिउड कलाकार दीपिका पादुकोणले लगाएको पोशाकको पनि नक्कल गरेकी छिन् । प्रियंका कार्कीले अन्य तस्वीर पनि सामाजिक सञ्जालमा पोस्ट गरेकी छिन् ।

ती तस्वीरको पोशाक बलिउड अभिनेत्री दीपिका पादुकोणले प्रयोग गरेको पोशाकजस्तै देखिएको छ । योपछि कतिले प्रियंका कान्स फिल्म फेस्टिभलका लागि गएको कि अर्कैको शैली कपी गर्न कान्स पुगेकी हुन् भन्दै प्रतिक्रिया दिएका छन् ।