काठमाडौँ- प्रधानमन्त्री निवास बालुवाटारमा सत्ता गठबन्धनका प्रमुख नेताहरुबीच छलफल भएको छ । प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल प्रचण्ड र नेकपा (एकीकृत समाजवादी) का अध्यक्ष माधवकुमार नेपालबीच बुधबार अपरान्ह छलफल भएको हो ।

करिब २ घण्टा उनीहरुबीच छलफल भएको बालुवाटार स्रोतले जनायो ।

प्रदेश १ र बागमती प्रदेशमा एमाले नेतृत्वको सरकारले विश्वासको मत लिन ढिलाइ गरिरहेका बेला सत्ता गठबन्धनका नेताहरुबीच भएको यो छलफललाई अर्थपूर्ण रुपमा हेरिएको छ । दुबै प्रदेशमा एमाले नेतृत्वको सरकार स्पष्ट अल्पमतमा छ । त्यसैले यी दुई प्रदेशमा नयाँ सरकार बनाउने विषयमा उनीहरुबीच छलफल भएको छ ।

यी दुबै प्रदेशमा नेकपा (एकीकृत समाजवादी) नेतृत्वमा सरकार बनाउने विषयमा दलहरुबीच मोटामोटी सहमति बनेको छ । तर त्यसको औपचारिक जानकारी भने दिइएको छैन ।

प्रधानमन्त्री देउवासँग छलफल गर्नुअघि माओवादी केन्द्रका अध्यक्ष प्रचण्डले कोटेश्वर पुगेर नेकपा (एकीकृत समाजवादी) का अध्यक्ष नेपालसँग छलफल गरेका थिए ।