मुम्बई(एबीपी लाइभ)– भारतको बेङ्लोरका एक ट्याक्सी चालकले कन्नड अभिनेत्री सञ्जना गलरानीविरुद्ध उजुरी गरेका छन् । उनले अभिनेत्रीमाथि ट्याक्सीमा एयर कण्डिसनर नलाउदा आफूमाथि गाली गरेको आरोप लगाएका छन् ।

ती चालकका अनुसार ट्याक्सीमा एसी चलाउनु कर्नाटकको कोभिड–१९ दिशानिर्देशको विरुद्ध हो । तर अभिनेत्री गलरानीले सामाजिक सञ्जालमा आफूलाई चालकले दुःख दिएको र उनले आफूलाई कोभिड–१९ दिशानिर्देशका बारेमा केही नबताएको उल्लेख गरेकी छन् ।

‘सञ्जना मंगलबार बिहान यहाँ दोम्मलूरमा आफ्नो ट्याक्सीमा थिइन् । उनी ट्याक्सीमा बसिन् र मलाई एयर कन्डिसनर चालु गर्न भनिन् । मैले सरकारको कोभिड–१९ दिशानिर्देश अनुसार एयर–कण्डिसनर चालु गर्न अस्वीकार गरें । त्यसपछि उनले ठूलो स्वरमा मेरो स्तरको बारेमा गाली गरिन्’, चालकको उजुरीपत्रमा उल्लेख छ ।

चालकले आफूलाई अभिनेत्रीले अपहरणको मामला दर्ता गर्ने र सामाजिक सञ्जालमा आफूविरुद्ध अभियान चलाउने धम्की दिएको दाबी गरे । उनले आफूले कर्नाटक ड्राइभर्स फेडरेसनमा आफूमाथि भएको दुव्र्यवहारका विषयमा जानकारी दिएको बताएका छन् ।

अभिनेत्री सञ्जनाले भने घटनाप्रति आफू दुःखी भएको बताएकी छन् । ‘के म एक ट्याक्सी ड्राइभरलाई चुनौती दिन सक्छु ? म यति निच काम कहिल्यै गर्दिनँ । एक ग्राहकका रुपमा मैले ट्याक्सीमा सेवा मागेको हुँ । यो मेरो अधिकार हो । चालकले ममाथि लगाएको आरोप केवल कथाबाहेक केही होइन’, उनले भनेकी छन् ।