एजेन्सी- पाकिस्तानको खैबर पख्तुनख्वा (केपीके) प्रान्तमा अल्पसंख्यक शिख समुदायमाथि ज्यादतीका घटना बढ्दै गएका छन् ।

बिहीबार फेरि एक युवा युनानी चिकित्सक सतनाम सिंहको हत्या भएको अन्तर्राष्ट्रिय सञ्चारमाध्यमहरुले जनाएका छन् ।

सिंह आफ्नो क्लिनिकमा रहेका बेला अज्ञात समूहले उनको गोली हानी हत्या गरेको जनाइएको छ । घटनाले केपीकेको सिख समुदायलाई थप त्रासमा पारेको छ । घटनाको शिख समुदायले निन्दा गरेका छन् ।

उक्त घटनाको पाकिस्तानी संसदमा पनि निन्दा भएको छ । पाकिस्तानका एक मात्र शिख सांसद गुरदीप सिंहले शुक्रबार सिनेटमा शिख समुदायलक्षित हत्याको मुद्दा उठाएका थिए । ‘मलाई थाहा छैन सतनाम सिंहको हत्याको पछाडि को थियो तर यो पक्का छ कि बदमाश तत्वहरु अल्पसंख्यक समुदायहरुलाई सिध्याउन चाहन्छन्’, उनले भने ।

लगत्तै सभामुख मुहम्मद सादिक संज्रानीले सिंहको हत्याको रिपोर्ट पेस गर्न सरकारलाई रुलिङ गरेका छन् ।

शिख अधिकारकर्मी रादेश सिंह टोनीले इस्लामिक स्टेट-खोरासान (आईएसआईएस-के) ले सतनाम सिंहको हत्याको जिम्मेवारी लिएको सन्देश सामाजिक सञ्जालमा सार्वजनिक भएको छ ।

भारतको शिख नेतृत्वले सतनाम सिंहको हत्याको निन्दा गर्दै अल्पसंख्यक  शिख समुदायको सुरक्षाको सुनिश्चित गर्न पाकिस्तान सरकारसँग माग गरेको छ । पञ्जाबका पूर्वमुख्यमन्त्री अमरिन्दर सिंहले भने, ‘पेशवारमा हकीम सतनाम सिंहको क्रुर हत्याको निन्दनीय छ । पाकिस्तानले यसमा ठोस कदन चाल्न आवस्यक छ।’

सात वर्षमा केपीकेमा मुख्यमन्त्री परवेज खान खट्टकका पूर्वसल्लाहकार डा.स्वर्ण सिंहसहित १३ शिखहरुको हत्या भएको प्रहरीलाई उद्धृत गर्दै जारी भएको एक रिपोर्टमा उल्लेख छ ।