काठमाडौं– ट्राफिक प्रहरीले मोटरसाइकलमा यात्रा गर्ने दुवै जनाले हेल्मेट (टोप) लगाउनुपर्ने नियम तत्कालै कार्यान्वयन नहुने जनाएको छ ।

महानगरीय ट्राफिक प्रहरी महाशाखाले आइतबार मात्रै अब मोटरसाइकलको पछाडि बस्ने व्यक्तिले पनि हेलमेट लगाउनुपर्ने नियम कार्यान्वयन गरिने जनाएको थियो ।

तर, सामाजिक सञ्जालमा उक्त घोषणाको व्यापक विरोध भएपछि ट्राफिक प्रहरी महाशाखाले उक्त नियम तत्काल कार्यान्वयन नहुने जनाएको हो ।

ट्राफिक प्रहरी महाशाखाले सवारी तथा यातायात व्यवस्था ऐन २०४९ को दफा १३० को उपदफा (२) बमोजिम दुईपाङ्ग्रे सवारी (मोटरसाइकल) चलाउँदा चालक तथा सो सवारीमा बस्ने मानिसले पनि हेल्मेट लगाउनुपर्ने नियम कार्यान्वयन गरिने जनाएको थियो ।

तर, सोमबार भने उक्त नियम यातायात व्यवस्था विभाग, ट्राफिक प्रहरी र अन्य सरोकारबावाला निकायबीचको समन्वय र सहकार्यपश्चात मात्रै कार्यान्वयन हुने महाशाखाले जनाएको छ ।