मुम्बई(दैनिक भास्कर)– हालैमात्र अभिनेत्री रिया चक्रवर्ती रियालिटी शो ‘बिग बोस १५’को सेट बाहिर शोका प्रतिष्पर्धी तेजस्विनी प्रकाश र दलजीत कौरका साथ देखिएकी थिइन् । उनी त्यहाँ देखिएपछि रिया ‘बिग बोस’को यो सिजनका लागि ‘लक’ हुन लागेको खबर सार्वजनिक भएको थियो ।

अभिनेता सुशान्त सिंह राजपूतको निधनपछि रिया सर्वाधिक चर्चामा आइन् । यस्तो अवस्थामा शोमा रियाको उपस्थिति टीआरपी बढाउन महत्वपूर्ण भूमिका खेल्ने निर्माताको बुझाइ छ । रियालाई निर्मातले प्रति एपिसोड ३५ लाख रुपैंयाँ पारिश्रमिक दिने निर्णय लिएका थिए ।

तर रिया कानूनी मुद्धामा फसेका कारण यो शोबाट पछाडि हट्नु परेको छ । सुशान्तको मृत्युपछि रिया र उनको भाई शौविकको नाम लागुऔषध मामलामा मुछिएको थियो । जसकारण उनी कैयौं दिनसम्म हिरासतमा बस्नु परेको थियो । अहिले यो मुद्धा अदालतमा विचाराधिन छ ।

रिया पुनः फिल्ममा फर्कन चाहन्छिन् । जसका लागि उनले दक्षिण भारतीय फिल्मका कैयौं निर्मातासँग भेटघाट गरिसकेकी छन् । कतिपयले फिल्ममा अभिनयका लागि उनले ‘बिग बोस’को प्रस्ताव अस्वीकार गरेको दाबी गरेका छन् । तर रियाले यो विषयमा केही बोलेकी छैनन् ।