काठमाडौं– लामो समयको विश्रामपछि पपगायक निमा रुम्बा गायनमा फर्किएका छन् । ‘मिस् क्याटवाक’, ‘हुरी बतास’, ‘आऊ आऊ न’, ‘प्रिति बस्यो’, ‘साझमा पनि’, ‘मेरी प्रियसी’ जस्ता लोकप्रिय गीतका गायक निमा नयाँ गीत ‘पागल प्रेमी–२ (क्रेजी लभर)’ लिएर श्रोता तथा दर्शकमाझ आएका छन् । गीतमा निमाकै शब्द, संगीत र स्वर रहेको छ ।

निमाले आर एण्ड बि र्याप शैलीको समिश्रण रहेको ‘पागल प्रेमी (मायालु तिमी भनिदेउ)’ वि.सं. २०५० सालमा ल्याएका थिए, जुन गीत अलटाइम हिट गीत हो । हाल सार्वजनिक गीत निमाले केही वर्षअघि नै रेकर्ड गराएका थिए । गीतमा निमा र गायक स्व. सुनील बर्देवाले २०७० मा एरेन्ज सुरु गरेका थिए । सुनीलको असामयिक निधनसँगै ‘पागल प्रेमी २’ को ‘क्रेजी लभर’ निमा र सुनीलको सहकार्य रहेको अन्तिम गीत बन्न पुगेको छ । यो पप, इडिएम, डिस्को र आर एण्ड बि शैलीको फ्युजन गीत हो ।

अमेरिकामा खिचिएको यो गीतको भिडियोमा निमा आफैं प्रमुख भूमिकामा छन् । उनको साथमा ‘मिस युनिभर्स नेपाल २०२१’ की विजेता अंशिका शर्मा र ‘मिस्टर यूएसए’ तथा दुईपटक मेन्स फिजिक गोल्ड मेडल जितेका तथा प्रो कार्ड विजेता उत्सव सिंहले फिचर्ड छन् । यी कलाकारसँगै केहि अमेरिकन कलाकारहरुको पनि अभिनय रहेको छ । भिडियोमा अण्डरकभर मिशनमा रहेका जासुस कथा समेटिएको छ ।

आशिष श्रेष्ठ निर्देशित भिडियोमा पटकथा र सम्पादन पनि उनकै छ । भिडियो युवा फिल्म्स र आहा प्रोडक्सनले तयार पारेको हो । भिडियोका सह–निर्माता उज्ज्वल सिंह हुन् ।

गायक रुम्बाले आफ्नो गीतको भिडियो हलिउडस्तरमा तयार भई रिलिज भएकोमा खुसी व्यक्त गरे । गीत रिलिजसँगै उनले आफ्नो केही समयको ग्यापलाई यो गीतले पुर्ण गर्न सफल रहनेमा विश्वास रहेको बताएका छन् ।