मुम्बई(एबीपी लाइभ)– बलिउड अभिनेता शाहरुख खान र गौरी खानलाई बलिउडको सुन्दर जोडीका रुपमा हेरिन्छ । शाहरुख मुस्लिम हुन् र उनकी पत्नी गौरी पञ्जाबी हुन् । उनीहरुको प्रेम विश्वका लागि एउटा उदाहरण बनेको छ । शाहरुख सन् १९८८ मा पहिलोपटक गौरीसँग भेट हुँदा उनको प्रेममा परे । शाहरुख गौरीप्रति कति आशक्त थिए भने गौरीकै लागि उनले पत्रकारमाथि तरबार बोकेर जाइलागे ।

शाहरुखले सन् १९९१ अक्टोबर २५ मा गौरीसँग विवाह गरेका थिए । त्यसपछि उनी आफ्नो करियर बनाउनका लागि मुम्बई आए । सन् २०१३ मा शाहरुखले तहलका थिंकको एक कार्यक्रममा विवाहको समयका बारेमा बताएका थिए ।

‘सन् १९९३ मा जब मेरो फिल्म ‘कभी हाँ कभी ना’ रिलिज भएको थियो, त्यही बेला एक पत्रकारले फिल्मको सहअभिनेत्रीसँग मेरो अफेयर भनेर समाचार प्रकाशन गरेका थिए । जसलाई लिएर गौरी निकै चिन्तित बनेकी थिइन् । गौरीलाई मसँग विवाह गरेर आफूले कुनै गल्ती त गरेको होइन भन्नेसम्मको शंका उब्जिएको थियो’, उनले भनेका छन् ।

त्यसपछि शाहरुख निकै रिसाए । शाहरुखका ससुरा सेनाका एक अधिकारी थिए । पञ्जाबी विवाहमा जसरी गरिन्छ, त्यसरी नै उनका ससुराले गौरीको रक्षाका लागि एक तरबार दिएका थिए । ‘मलाई लाग्यो कि यो एक यस्तो हतियार हो, जसलाई भारतीय सेनाले मञ्जुरी दिएको थियो । मैले त्यो तरबार बोकेर मेरो बारे गलत समाचार लेख्ने पत्रकारको घरमा पुगें । पत्रकारको खुट्टामा तरबार तेस्र्याएँ र फेरी फिल्मको सेटमा फर्किएँ’, शाहरुखले भनेका छन् ।

शाहरुखले यो घटनाको भोलिपल्ट केही प्रहरी आएर उनलाई हिरासतमा लिएर गएका थिए । उनलाई यो समयमा प्रहरीले एक फोन गर्न पाउने अनुमति दिएको थियो । उनलाई त्यो पत्रकारलाई फोन गरे, जसलाई उनले तरबार बोकेर धम्क्याएका थिए । उनले ‘अहिले म जेल जाँदैछु, जेलबाट निस्किएँ भने तँलाई काटिदिन्छु’ भनेर धम्क्याए ।

यो घटनापछि अभिनेता नाना पाटेकरले उनलाई जेलबाट निकाले । जो यही फिल्ममा शाहरुखसँग काम गरिरहेका थिए ।