काठमाडौं– चन्द्रागिरी उपमेयर कप अन्तरविद्यालय स्तरीय खुल्ला छात्रा भलिबल प्रतियोगिता आउँदो बुधबारबाट शुरु हुने भएको छ ।

भलिबल राष्ट्रिय खेल घोषणा भएको दिनलाई भलिबल ‘डे’ मनाउने लक्ष्यसहित हुन लागेको प्रतियोगिता ११ गतेसम्म चल्नेछ । मदन भण्डारी स्पोर्टस् एकेडेमी चन्द्रागिरी नगर कमिटिले आइतबार पत्रकार सम्मेलन गरी प्रतियोगिता बारे जानकारी गराएको हो ।

१० स्कुलको सहभागिता रहने प्रतियोगिता लिग कम नकआउटका आधारमा हुने अध्यक्ष अष्टकुमार महर्जनले जानकारी दिएका छन् । लिग र क्वार्टफाइनलका खेल बेस्ट अफ थ्री र सेमिफाइनल र फाइनल बेस्ट अफ फाइभको फर्म्याटमा हुने आयोजकले बताएको छ ।

विजेताले ६० हजार नगदसहित शिल्ड मेडल र प्रमाणपत्र पुरस्कार पाउनेछन् । दोस्रो हुने टोलीले ३० हजार, तेस्रो हुने टोलीले १५ हजार तथा चौथो हुने टोलीले १० हजार प्राप्त गर्नेछ । सर्वोत्कृष्ट खेलाडीले १ हजार पाँच सय, व्यक्तिगत ५ विधामा उत्कृष्ट हुनेलाई १ हजार पुरस्कार दिइने संयोजक राईले जानकारी दिए ।

यस्तै, प्रतियोगिताको अवसरमा नै भलिबल दिवस मनाउने क्रममा कुनै एक विभागीय टोली र न्यू डायमण्ड एकेडेमीबीच सेलिब्रेसन खेल हुनेछ ।