मुम्बई(दैनिक जागरण)– बलिउड अभिनेता दिलीप कुमारकी श्रीमति र लोकप्रिय अभिनेत्री सायरा बानोले दिलीपको ट्विटर एकाउण्ट बन्द गर्ने घोषणा गरेकी छन् । दिलीपको निधन गत जुलाई ७ मा भएको थियो ।

उनले के कारणले ट्विटर बन्द गर्न लागेको हो भन्ने बारे केही खुलाइएको छैन । दिलीपको निधन पछि सायरा ठूलो शोकमा थिइन् । जसकारण उनी बिरामी भएर अस्पताल नै भर्ना हुनुपर्यो ।

दिलीपको ट्विटरमार्फत उनीसँग जोडिएका हरेक विषय अपडेट भइरहन्थ्यो । तर अहिले भने सायराले यो एकाउण्ट बन्द गर्ने निर्णय लिएकी छन् । दिलीपको एकाउण्ट चलाउने फैजल फारुकीले सायरासँगको परामर्शपछि एकाउण्ट बन्द गर्न लागिएको बताए ।

दिलीपले सन् २०११ बाट ट्विटरको प्रयोग गरेका थिए । उनको ६ लाख बढी फलोअर्स छन् । यद्यपि दिलीपले ६ व्यक्तिलाई मात्र फलो गर्थे ।

उनको फलोअरमा प्रधानमन्त्री नरेन्द्र मोदी, पीएमओ, अमिताभ बच्चन, लता मंगेशकर, शाहरुख खान र फैजल फारुकी छन् ।