काठमाडौँ– मंगलबार एक बजेका लागि बोलाइएको प्रतिनिधिसभाको बैठक यो समाचार तयार पार्दासम्म सुरु हुन सकेको छैन । सभामुख अग्नि सापकोटा एमाले विभाजनको ‘मतियार’ भन्दै प्रमुख प्रतिपक्षी दल नेकपा एमालेले लगातार बैठक अवरोध गरिरहेका कारण तोकिएको समयमा बैठक सुरु हुन नसकेको हो । मंगलबारको बैठक सञ्चालनका लागि सभामुख अग्नि सापकोटाले एमालेसँग छलफलको प्रयास गरे पनि छलफल हुन सकेन ।

तर, संसद सचिवालयले मंगलबारको बैठकको कार्यसूची भने प्रकाशित गरेको छ । प्रतिनिधिसभाको बैठकका लागि मंगबार दुई वटा कार्यसूची रहेका छन् । अर्थमन्त्री जनार्दन शर्माले विनियोजन विधेयकमाथि विचार गरियोस भन्ने प्रस्ताव पेश गर्ने र शोक प्रस्ताव पारित गर्ने ।
सरकारले मंगलबार नै विनियोजन विधेयक पारित गर्ने तयारी गरेको छ । तर, एमालेले बैठक अवरोध गर्ने जनाइसकेको छ ।