दोहा- वैदेशिक रोजगारीका क्रममा साउदी अरब पुगेका ४० नेपाली युवा समस्यामा परेका छन् । भिसाको म्याद सकिएर कम्पनीले एक्जिट भिसा नलगाइ दिएपछि उनीहरू साउदीमै रोकिएका छन्  ।

साउदीको जेद्धामा रहेको सेद इन्टरनेसनलले कम्पनीले समयमा एक्जिट भिसा नलगाई दिदा स्वदेश फर्किन समस्या भएको पीडित नेपालीहरुले बताएका छन् ।

‘तीन वर्ष भन्दाबढी भयो घर नगएको अहिले हामी पाँच महिनादेखि घर फर्किने तयारीका साथ कोठामै बसिरहेका छौ,’ बर्दिया तारातालका गजेन्द्र भण्डारीले खबरहबसँग भने कम्पनीले एक्जिट भिसाको प्रोसेस भईरहेको छ मात्र भन्छ अहिलेसम्म केही भएको छैन् ।

‘हामी एउटै कम्पनीमा काम गर्ने  ४० नेपाली एक्जिट भिसाको पर्खाइमा बसेको पनि पाँच महिना भयो,’ उनले भने, ‘कम्पनीले खानबस्न दिए पनि लामो समयसम्म कोठामा बसिरहेकोले मानसिक तनावमा छौ ।’

आफूहरुको समस्या जेद्धास्थित महाबाणिज्य दूतावासलाई पनि ४० जनाकै नाम लिष्टसहित जानकारी गराएको भए पनि आज हुन्छ, भोली हुन्छ भनेर झुलाई रहेको उनीहरुले गुनासो गरेका छन् ।

यता दूतावासले भने पीडितको समस्या समाधानको प्रयास जारी रहेको जनाएको छ । एक्जिट भिसाको पहल भैरहेको दूतावासले जनाएको छ । यस्ता समस्या दिनप्रतिदिन बढ्न थालेको भन्दै नेपाली कामदारको अवस्था बुझ्न र समाधानको पहल गर्न पीडित कामदारले दूतावासलाई आग्रह गरेका छन् ।

पाँच महिनादेखि भिसाविहीन अवस्थामा बसिरहेको भन्दै उनीहरुले त्यहाँ रहेका विभिन्न संघसस्था लगायत सम्बन्धित निकायलाई आफूहरुलाई सहयोग गर्न अनुरोध गरेका छन् ।

कोरोना महामारीका कारण साउदी अरबबाट करार अबधि सकिएर स्वदेश फर्किने नेपालीले टिकट पाए पनि एक्जिट (बहिर्गमन) भिसा नपाउदा सयौँ नेपालीहरु समस्या परेका छन् ।

पछिल्लो समयमा कम्पनीले महामारीको कारण देखाउँदै कामदारलाई बिना पारिश्रमिक कम्पनीबाट निकाल्ने तथा समयमा एक्जिट भिसा नलगाई दिने र करार अबधि सकिएपछि पनि घर नपठाउने गरेको गुनासो बढ्न थालेको छ ।