आफू धुपमा उभिएर सन्तानलाई

छाया प्रदान गर्ने

आफू सन्तापले जलेरै पनि सन्तानलाई

खुशी बाँड्ने

आफ्नो दुःख लुकाएर

सन्तानको खुशीमा हाँस्ने

सन्तानको लागि शीतल छहारी

पिताजी ।

सन्तानका लागि अविराम यात्रा

अविराम प्रयास, अविराम चिन्तन

अविराम शिक्षा, अविराम तपस्या

हाम्रो जीवनयात्राको आधार

पिताजी ।

अर्थदेखि परमार्थसम्म

स्वयंदेखि अखिल ब्रह्माण्डसम्म

भ्रमदेखि सत्यतासम्म

ज्ञान, विवेक, शिक्षा, नीति

सबैसँग साक्षात्कार गराउने गुरु

पिताजी ।

अनेकमा एक, गागरमा सागर

शोकमा धैर्य, संकटमा संयम्

अद्भूत शिक्षक, निःस्वार्थ उपदेश

दुर्लभ र असीम भाव

पिताजी ।

तपस्याको रूप पिताजी

स्वर्गरूप पिताजी

आकाशरूप पिताजी

देवता पिताजी

मोक्षरूप पिताजी,

श्रद्धा र सेवाको साक्षात रूप पिताजी

कोटी कोटी प्रणाम पिताजी ।