नयाँ दिल्ली– भारत आउन चाहने अफगानी नागरिकहरुलाई आकस्मिक प्रवेश अनुमति (भिसा) दिने भारतले घोषणा गरेको छ । भारतीय गृहमन्त्रालयले ६ महिनाका लागि आकस्मिक भिसा दिने घोषणा गरेको एएनआई समाचार एजेन्सीले जनाएको छ ।

अफगानिस्तानमा तालिबानको नियन्त्रणपछि हजारौं अफगानीहरुले अफगानिस्तान छाडिरहेका छन् । भारत र तालिबानबीच सुमधुर सम्बन्ध नहुने संकेतहरु देखिएका बेला भारतले अफगानीहरुलाई आकस्मिक भिसा दिने घोषणा गरेको हो ।

भारतले अफगानिस्तानमा तालिबानको कब्जापछि आफ्नो राजदूतावास बन्द गरिसकेको छ । भारतीय प्रधानमन्त्री नरेन्द्र मोदीले हालै एक सार्वजनिक कार्यक्रममा आतंकीको सत्ता धेरै नटिक्ने बताएको भन्दै तालिबानले आपत्तिसमेत जनाएको छ । तालिबानले अफगानिस्तानको आन्तरिक मामिलामा हस्तक्षेप नगर्न भारतलाई सचेत गराएको छ ।