काठमाडौँ– नेपाली राष्ट्रिय क्रिकेट टिम मंगलबार ओमान प्रस्थान गरेको छ । क्रिकेट विश्व च्याम्पियनसिप लिग २ र पपुवा न्युगिनीसँगको एक दिवसीय क्रिकेट श्रृंखला खेल्न नेपाली टिम मंगलबार त्यसतर्फ लागेको हो । ज्ञानेन्द्र मल्लको कप्तानीमा रहेको टिमलाई नेपाल क्रिकेट संघ (क्यान)का अध्यक्ष चतुरबहादुर चन्द, सचिब अशोकनाथ प्याकुरेलसहितका पदाधिकारीले बिदाइ गरेका छन्  ।

ओमानमा रहँदा नेपालले लिग २ मा अमेरिका र ओमानसँग त्रिकोणीय श्रृंखलाका ४ खेल खेल्नेछ । लिगमा तीनवटै देशले एकअर्का विरुद्ध २–२ खेल खेल्ने छन् । लिगभन्दा अघि नेपालले पपुवा न्युगिनीसँग २ खेलको एकदीवसीय क्रिकेट श्रृंखला खेल्ने छ ।

पूर्व कप्तान पारस खड्काको सन्यासपछि नेपालले पहिलो पटक अन्तर्राष्ट्रिय क्रिकेट खेल्दैछ। नेपाल यो पटक नयाँ जर्सीमा समेत मैदानमा देखिने छ। यो खेलमा पारसको कमी कुन खेलाडीले पूरा गर्छन् भन्ने हेर्न लायक हुनेछ। यस्तै तिब्र गतिका बलर गुल्सन झा पहिलो पटक राष्ट्रिय टिममा अटाएका छन् । उनले डेब्यूको मौका पाउँछन् वा पाउँदैनन् त्यो भने पक्का छैन ।

सोमपाल कामी, करण केसी र अभिनाष बोहोरासमेत टिममा तिब्र गतिका बलर छन् । त्यसैले झाले डेब्यूको मौका पाउन कठिन प्रतिस्पर्धा गर्नुपर्ने अवस्था छ । नेपालका प्रमुख प्रशिक्षक डेभ व्हाटमेरका लागि यो पहिलो परीक्षासमेत हो ।