पोखरा– पर्यटकीय नगरी पोखराको सिर्जना चोकमा पहिलो आकाशेपुल बनेको छ । मानिसको चाप बढ्दै गएको पोखरामा सडक दुर्घटना रोक्नकै लागि आकाशे पुल निर्माण गरिएको हो ।

बाटो पार गरी लेकसाइड, पृथ्बीचोक, राष्ट्र बैंक र सिद्धार्थचोकतर्फ चारैतिर जान मिल्ने गरी बनाइएको सिर्जना चोकको फलामे पुल पोखराबासीकै लागि आकर्षणको केन्द्र बनेको छ ।

कोरोना संक्रमणका कारण सुनसान बनेको पोखरामा केही दिनयता मानिसको चहलपहल बढ्दै गए पनि त्यतिधेरै चाप बढिसकेको छैन ।

सडकमा सवारी साधनहरु पनि बाक्लो गरी गुडेको देखिँदैनन् । तर भर्खरै निर्माण गरिएको पहिलो आकाशेपुल हेर्न आउनेको भीँड बढ्दै जाँदा कोरोना संक्रमणको जोखिम बढेको छ ।

सडकको चार दिशातर्फ बाटो पार गर्न मिल्ने गरी निर्माण गरिएको यो आकाशे पुलमा पानी परेकोबेलासमेत ओत लाग्न मिल्ने गरी प्लाष्टिक टिनको छाना लगाइएको छ । आकाशे पुलबाट सडकको दृष्य आउने गरी तस्वीर खिचाउन र टिकटक बनाउनेहरुको निकै भीँड लाग्ने गरेको छ ।

पोखराकै पहिलो आकाशे पुल यतिबेला सर्वसाधारणको लागि आकर्षक बनेको छ । साँझको बेलामा यो पुलमा निकै भिँडभाड देख्न सकिन्छ ।

कोरोना संक्रमणको जोखिम कायमै रहेको भन्दै निषेधाज्ञा कायमै रहँदासमेत सर्वसाधारणको भीँड बढेपछि गण्डकी प्रदेश स्वास्थ्य निर्देशनालयले भीँडभाड नगर्न सार्वजनिक अपिल नै जारी गरेको छ ।

कोरोनाले थलिएको पर्यटकीय नगरी पोखरामा सिर्जनाचोकको नवनिर्मित आकाशेपुलमा मात्र नभई फेवा पावरहाउस छेउको झरना, बेगनाशत तथा फेवाताल वरपर पनि मानिसहरुको अनावश्यक भीँड बढ्नै गएको छ ।

संक्रामक हुन सक्ने यस्ता ठाउँहरुमा नजान भन्दै निर्देशनालयले सामाजिक सञ्जालबाट सचेत गराएको छ । आकाशेपुल लगायतका ठाउँहरुमा अत्याधिक भीँड बढेको भन्दै निर्देशनालयको हटलाइन नम्बर तथा म्यासेन्जरमा गुनासो आएपछि निर्देशनालयले सचेत गराएको हो ।

पोखरा लेखनाथ महानगरपालिकाको दुई करोड १५ लाख रुपैँया लागतमा सिर्जनाचोकमा ‘स्टिल ट्रस पेडेस्ट्रेन ओभरहेड ब्रिज’ (आकाशे पुल) निर्माण गरिएको हो ।

पोखरा महानगरपालिकाका मेयर मानबहादुर जिसीकाअनुसार आकाशे पुल निर्माण गर्न पूर्व पर्यटनमन्त्री कास्की क्षेत्र नं २ का प्रतिनिधिसभा सदस्य स्वर्गीय रवीन्द्र अधिकारीको सांसद विकास कोषबाट पूर्वाधार विकास कार्यक्रममार्फत् रु. ५० लाख छुट्याइएको थियो ।

१५ महिनामा निर्माण सम्पन्न गर्ने गरी २०७६ जेठ ५ गते पोखरा महानगरपालिकाले केएम जेबिएनएस पोखरा जेबीसँग सम्झौता गरेको थियो ।