काठमाडौं– कोभिड महामारीका कारण देशभरका फिल्म हल बन्द छन् । हल कहिले खुल्ने भन्ने कुरा आफैंमा अनिश्चित छ । यो अवस्थामा पनि फिल्म निर्माणको क्रम भने रोकिएको छैन ।

निर्माताहरु फिल्मलाई ओटीटी प्लेटफर्मबाट रिलिज गर्न तम्सिन थालेका छन् । कोभिड महामारीपछि विश्वव्यापी रुपमा फिल्म रिलिजको माध्यम ओटीटी प्रयोग भइरहँदा नेपालमा पनि त्यसको सुरुवात हुन थालेको छ ।

कोरोना महामारीमा ‘हिरो रिर्टन्स’, कोपिला’ र ‘लभ सर्कल’ डिजिटल प्लेटफर्मबाट रिलिज भइरहँदा अब यो सूचीमा मनोज पण्डित निर्देशित फिल्म ‘एक’ पनि जोडिएको छ ।

यो फिल्म आगामी असोज २१ गते घटस्थापनाको दिन डिजिटल रिलिज हुँदैछ । जिजिए ग्रुपले फिल्मको वितरणको जिम्मा लिएको छ ।

फिल्म युनिटले मंगलबार मोशन पोस्टर सार्वजनिक गरेको छ । जसमा द्वन्द्व, आक्रोश, बदलाको भाव देखिन्छ । मधेशको मुद्धामा केन्द्रित फिल्ममा विशाल पोखरेल, प्रमोद अग्रहरि र ज्योत्सना योगीको प्रमुख भूमिकामा अभिनय छ ।

निर्देशक पण्डितले फिल्म स्पाई थ्रिलर जनराको भएको बताए । स्क्रिप्ट फ्याक्ट्रीको ब्यानरमा आत्मा गुरागाइँ र सोफिया थापा निर्मित फिल्ममा बाल कलाकारको विश्वन्त पोखरेल छन् । फिल्ममा प्रमोद खड्काको द्वन्द्व निर्देशन छ ।