काठमाडौं– अखिल नेपाल फुटबल संघ एन्फाको कार्यसमिति बैठकले वरिष्ठ उपाध्यक्षमा पंकज विक्रम नेम्वाङलाई चयन गरेको छ । मंगलबार बसेको एन्फा कार्यसमिति बैठकले नेम्वाङलाई चयन गरेको हाे ।

वरिष्ठ उपाध्यक्षका लागि उपाध्यक्ष विर बहादुर खड्काले दाबी पेश गरेका थिए । बैठककै क्रममा विवाद उत्पन्न भएपछि उपाध्यक्ष खड्का सहितको टोलीले  बैठक बहिष्कार गरे ।  उनीहरुले विधान वैधानिक नभएको भन्दै बैठक बहिस्कार गरे । उपाध्यक्ष खड्काले चितवनमा सम्पन्न साधारण सभाबाट संशोधन भएको विधानमा राष्ट्रिय खेलकुद (राखेप)को छाप नभेटेपछि विधान अवैधानिक भन्दै विरोध गरेको बताएका छन् ।

‘कार्यसमिति बैठक बस्नु भन्दा १४ दिन अगाडि सदस्यहरुलाई जानकारी गराउने प्रावधान पुरानो विधानमा व्यवस्था थियो । तर, संशोधित विधानमा ७ दिनभित्रै जानकारी गराउनुपर्ने व्यवस्था भए पनि विना स्वीकृत बैठक बोलाइएको हुँदा वैधानिक लागेन । बैठक बहिष्कार गर्‍यौं,’ उपाध्यक्ष खड्काले भने, ‘संशोधित विधान हेर्दा विधान नै राखेपबाट स्वीकृत नभएको पाइयो ।’

खबरहबसँग कुरा गर्दै खड्काले भने,‘यसअघि कर्मा जीहरुले नै तत्कालीन कार्यसमितिविरुद्ध आन्दोलन थाल्दा फिफा र एएफसीको नियम मात्र नभइ सरकारको स्वीकृति पनि चाहिन्छ भन्नु भएको थियो । तर, अब अहिले राखेपले स्वीकृति नदिँदै पेलेर जान खोज्नुभयो ।’

उपाध्यक्ष खड्कासहितको टोलीले बैठक बहिस्कार गरेपनि एन्फा कार्यसमिति बैठक भने जारी छ । तर, बैठकले गरेका कुनै पनि निर्णयहरु आफूहरुका लागि अमान्य हुने भन्दै यस्ता निर्णय विरुद्ध राष्ट्रिय खेलकुद परिषद् र युवा तथा खेलकुद मन्त्रालयमा उजुरी गर्ने खड्काले बताए ।

‘विधानमा छाप नदेखेपछि हामीले बैठक बहिस्कार गर्‍यौं । आज कुनै पनि निर्णय गरे राखेप र मन्त्रालयमा उजुरी दिन्छौं । कर्मा जिको आर्थिक पारदर्शिता लगायतका विषयहरु थिए तर, विर्सनु भयो,’ उनले भने ।