काठमाडौँ- तालिबानको अफगानिस्तानका विभिन्न शहरमा आफ्नो पकड जमाउँदै लगेपछि विदेशी मुलुकहरुले आफ्ना कुटनीतिज्ञ र नागरिकको धमाधम उद्धार थालेका छन् ।

तालिबान बिद्रोहीले लोघर प्रान्तको राजधानी पुल–ए–आलम नियन्त्रणमा लिएका छन् । सो शहर राजधानी काबुलबाट ८० किलोमिटर मात्रै पर रहेको छ ।

तालिबानले एक तिहाइ प्रान्त कब्जा गरेर आक्रमण जारी राखेपछि अमेरिका, बेलायत, जर्मनीलगायतका मुलुकले थप सैन्य फोर्स अफगानिस्तानमा उतार्दै आफ्ना नागरिक र कुटनीतिज्ञको उद्धार थालेको अन्तर्राष्ट्रिय सञ्चार माध्यमहरुले जनाएका छन् ।

यसैबीच कूटनीतिक कर्मचारी तथा अन्य नागरिकको उद्धारका लागि अमेरिकी सैनिकको पहिलो टोली अफगानिस्तान पुगेको छ । उक्त टोलीमा तीन हजार अमेरिकी सैनिक छन् । उनीहरुलाई एकसाता भित्र फिर्ता लगिसक्ने जनाइएको छ ।

अमेरिकाले काबुलमा रहेको आफ्नो दूतावासका कर्मचारीहरुलाई संवेदनशील कागजात तथा सामग्रीहरुको संरक्षणका लागि आवश्यक उपकरणको व्यवस्था गरिसकेको पनि जनाएको छ ।

बेलायतले आफ्ना नागरिकको उद्धारका लागि ६०० सैनिक पठाउने तयारी गरेको छ । यस्तै जर्मनीले, डेनमार्क र नर्वेले भने अफगानिस्तानमा रहेका आफ्ना दूतावास बन्द गर्दै कर्मचारी उद्धारको तयारी थालेका छन् ।

अमेरिकीसहित नेटोसँग आवद्ध विदेशी सैनिकको अन्तिम समूह फिर्ता हुने क्रम जारी रहेसँगै तालिबानले आक्रमण तीब्र पारेको छ । सेप्टेम्बर ११ सम्ममा अफगानिस्तानबाट सबै विदेशी सैनिक फिर्ता हुँदैछन् ।