काठमाडौँ– म्याद गुज्रिएको सामानलाई ’रिलेबलिङ’ गर्ने दुई जनालाई प्रहरीले पक्राउ गरको छ ।

आइतबार महानगरीय अपराध महाशाखाको टोलीले काठमाडौंको सानो भर्‍याङस्थित एक घरमा छापा मारी म्याद गुज्रिएको सामानमा ’रिलेबलिङ’ गर्ने गरेको पाइएपछि उनीहरुलाई पक्राउ गरेको हो ।

सो क्रममा प्रहरीले वीरगन्ज घर भएका अविनाश अग्रवाल र अर्का एक व्यक्तिलाई पक्राउ गरेको जनाएको हो ।

म्याद गुज्रिएका सबै प्रकारका सामानहरू ल्याएर उनीहरुले अर्को म्याद भएको लेबल टाँसेर पुनः विभिन्न ठूला मार्टहरूमा पठाउने गरेको पाइएको प्रहरीले जनाएको छ ।

महाशाखाका प्रमुख एसएसपी चन्द्र कुवेर खापुङले घरायसी सामानहरुलाई लेवलिङ गरेर पुनः बजारमा पठाइएको पाइएको जानकारी दिए । भाटभटेनी बिगमार्ट लगायतका स्थानबाट सामान ल्याएर ’रिलेबलिङ गरेको देखिएको उहाको भनाइ छ ।

अग्रवालले साढे तीन तल्लाको घर भाडामा लिएर यस्तो काम गर्दै आएको खुलेको छ । प्रहरीसहित पुगेको वाणिज्य विभागको टोलीले उक्त घरमा सिलवन्दी गरेको छ ।