मुम्बई(बलिउड लाइफ)– दक्षिण भारतीय अभिनेत्री सामन्था अक्किनेनीले हालै मात्र सामाजिक सञ्जालबाट आफ्नो ‘थर’ हटाएकी छन् । जसकारण उनका फ्यानमाझ विशेष चासो बढेको छ ।

सामन्था टलिउड सुपरस्टार नागार्जुनकी बुहारी हुन् । उनले सन् २००७ मा आफ्नो फिल्मको सुरुवात नागार्जुनको जेठा छोरा र अभिनेता नागा चैतन्यको फिल्म ‘ये माया चेस्वा’बाट गरेकी थिइन् । यो फिल्म सुपरहिट भएपछि उनले कहिल्यै पछाडि फर्किएर हेर्नुपरेन ।

नागा र सामन्थाले चार वर्ष अघि सन् २०१७ मा धुमधामका साथ विवाह गरे । विवाह पछि यी सुन्दरीले आफ्नो नाम पछाडि रहेको थर रुथ प्रभुको स्थानमा अक्किनेनी राखिन् । तर अहिले अचानक अभिनेत्रीले ट्वीटर र इन्स्टाग्रामबाट आफ्नो थर मात्र होइन, नाम नै हटाएकी छन् । उनले यसको स्थानमा अंग्रेजीको ‘एस’ मात्र लेखेकी छन् ।

अभिनेत्रीले नाम र थर नै किन हटाइन् भन्ने जिज्ञासा फिल्मकर्मीसँगै दर्शकमा पनि उत्तिकै छ । कतिपयले कतै उनको नागासँगको सम्बन्धमा खटपट त भएको होइन भन्ने आशंका पनि गरेका छन् ।

व्यावसायिक प्रवद्र्धनमा उत्तिकै सक्रिय रहने यी अभिनेत्रीले यही कामका लागि कतै नाम र थर हटाएको त होइन् भन्ने अड्कलबाजी पनि छ । उनको क्लोथिङ ब्राण्ड साकी निकै चर्चामा छन् ।

सामन्थाको कामको कुरा गर्दा मनोज बाजपेयी स्टारर वेब सिरिज ‘द फेमिली मेन २’को हिस्सा भएर पेन इण्डिया अडियन्समा आफ्नो पहुँच बढाएकी छन् । उनी चाँडै ‘शाकुन्तलम’मा देखिँदैछिन् ।