दोहा- भिसाको म्याद सकिएर मलेसियामा सयौँ नेपाली कामदार अलपत्र परेका छन् ।

म्याद सकिएसँगै घर फर्कनका लागि आवश्यक पर्ने चेक आउट मेमो प्राप्त गर्न नसक्दा उनीहरु अलपत्र परेको स्थानीय सञ्चारमाध्यम फ्रि मलेसिया टुडेले जनाएको छ ।

कोरोना महामारीपछि लगाइएको प्रतिबन्धका कारण अध्यागमन कार्यालयहरू बन्द भएकाले उनीहरुले चेक आउट मेमो प्राप्त गर्न सकेका छैनन् ।

अलपत्र नेपालीहरु साथीभाइको शरणमा बसेको मलेसियास्थित नेपाली दूतावासका द्वितीय सचिव प्रतीक कार्कीले जानकारी दिए ।

पछिल्लो समय मलेसिया सरकारले गैरकानूनी रुपमा बसेका नेपालीलगायत आप्रवासी कामदारहरुको बिरूद्ध कारबाही प्रकिया तीव्र पारेको छ ।

दूतावासले अध्यागमन अधिकारीहरूसँग कामदार वा रोजगारदाताहरूले एक्जिट मेमो लिनका लागि कम्तीमा एउटा काउन्टर खोल्न आग्रह गरिरहेको कार्कीले जानकारी दिए ।