काठमाडौँ– मध्य चीनको हेनान प्रान्तमा भारी वर्षापछिको बाढी तथा डुबानका कारण कम्तीमा ५६ व्यक्तिको मृत्यु भएको छ ।

शुक्रबारसम्म भएको अत्यधिक वर्षापछि आएको बाढी कारण प्रभावित चार लाख ९५ हजार व्यक्तिलाई अस्थायी रूपमा अन्य सुरक्षितस्थलमा सारिएको ग्लोबल टाइम्सले प्रान्तीय सरकारलाई उद्धृत गर्दै जनाएको छ ।

पिपुल्स लिबरेशन आर्मी (पीएलए) केन्द्रीय थिएटर कमान्डले २५ हजार सैनिक, सशस्त्र प्रहरीलाई हेनानको लागि पठाएको छ । ती सुरक्षा अधिकारी बाढीमा फसेका मानिसहरुलाई सुरक्षित रुपमा उद्धारको गर्नको लागि पठाइएको हो ।

चीनमा बाढी नियन्त्रणको लागि राहत मुख्यालयले पानीको स्रोत, आपतकालिन व्यवस्थापन र स्वास्थ्य मन्त्रालयहरूको एक टोलीले सिन्सिआङ्ग बाढीको असरबारे निरीक्षण गरेको छ ।

गएको साताको अन्तिमदेखि मुसलधारे वर्षाले हेनान प्रान्तलाई सताएको छ । प्रान्तीय राजधानी झेङझाओमा १२ करोड मानिस प्रभावित भएका छन् । झेङझाओको मौसम विभागले यो वर्षाको स्तरलाई एक हजार वर्षपछि आएको विपत्ति भनेको छ । (रासस/एएनआई)