जनकपुरधाम– नेपाली कांग्रेसको क्रियाशील सदस्य वितरणमा धाँधली भएको भन्दै जनकपुरका कांग्रेस नेता कार्यकर्ता आन्दोलनमा उत्रिएका छन् ।

प्रक्रिया विपरीत सदस्यता वितरण भएको आरोप लगाउँदै बुधबारदेखि जनकपुरधामस्थित पार्टी कार्यालयमा नेता एवं कार्यकर्ताले रिले अनसन थालेका हुन् ।

काठमाडौँमा पाँच दिनदेखि नेपाली कांग्रेस धनुषाका पूर्वसांसद तथा पूर्वराष्ट्रपति डा. रामवरण यादवका छोरा डा. चन्द्रमोहन यादवसहितका नेता आमरण अनसनमा छन् ।

उनकै समर्थनमा जनकपुरमा पनि बिहान ११ बजेदेखि बेलुका ५ बजेसम्म बस्ने गरी अन्सन जारी छ । तरुण दलको केन्द्रीय सदस्य नरेश यादवका अनुसार धनुषाको निर्वाचन क्षेत्र नम्बर १ र ४ मा क्षेत्रीय सभापतिले धाँधली गरी सदस्यताको वितरण गरेको छ ।

जिल्लाबाट पठाएको प्रतिवेदनको आधारमा सदस्यता वितरण हुनु पर्ने र प्रक्रिया विपरीत वितरण गरिएको सदस्यता रद्ध गर्नुपर्ने उनको माग छ ।

वडा सभापतिको जानकारी बिनै अन्य पार्टीबाट आएकालाई सदस्यता दिइएको उनले बताए । पार्टीलाई कब्जा गर्न र आफु सुरक्षित हुन यस्तो गरिएको उनको भनाइ छ ।

धनुषा निर्वाचन क्षेत्र नम्बर १ को सभापति जितनारायण यादव छन भने निर्वाचन क्षेत्र नम्बर ४ को सभापति योगी पञ्जियार छन् ।

उनीहरूले पार्टीको १४ औँ महाधिवेशनमा आफ्नो बर्चश्व देखाउन पार्टीको विधान विपरीत कार्य गरेको आरोप लागेको छ । धनुषामा १२ हजार क्रियाशील सदस्य थिए ।

१२ हजार पुनः थप्ने पार्टीको संस्थागत निणर्य भएपनि सात हजार मात्रै थपिएको छ । धनुषामा करिब १९ हजार क्रियाशील सदस्य छन् ।