दाङ– नेपाली कांग्रेसका नेता गगन थापाले जागरण अभियान तल्लो तहमा मात्र नभइ माथिल्लो तहसम्म आवश्यक रहेको बताएका छन् ।

दाङ दङ्गीशरण गाउँपालिका वडा नं ६ को श्रीगाउँमा प्रजातान्त्रिक उद्योगी व्यवसायी सङ्घले शनिवार आयोजना गरेको कार्यक्रमलाई सम्बोधन गर्दै नेता थापाले पार्टीले अहिले तल्लोस्तरको पार्टीलाई जागरण दिन अभियान सञ्चालन गरिरहेको भन्दै यो अभियान केन्द्रीयस्तरका नेताहरुका लागि आवश्यक रहेको बताए ।

“अहिले जिल्ला तहमा जागरण अभियान चलिरहेको छ, तर त्यो जागरण अभियान माथिसम्म पुग्नुपर्छ”, नेता थापाले भने, “माथिल्लो तहका नेतामा पनि जागरण आएन भने पार्टी सुधार हुन सक्दैन ।”

पार्टीभित्रको बिमेललाई मिलाएर पार्टीलाई एक ढिक्का बनाउनुपर्ने नेता थापाको भनाइ छ ।

पार्टीमा व्याप्त गुट–उपगुटले गर्दा पछाडि परेको भन्दै यसलाई सुधार गर्न आवश्यक रहेको थापाको भनाइ थियो । उनले केन्द्रीय नेताले नभइ तल्लो तहका कार्यकर्ताले कांग्रेसलाई जोगाएको उल्लेख गरे ।