मुम्बई(दैनिक जागरण)– सञ्जय लीला भन्साली निर्देशित फिल्म ‘देवदास’लाई बलिउडको एउटा उत्कृष्ट फिल्म मानिन्छ । अभिनेता शाहरुख खान र अभिनेत्रीद्वय माधुरी दीक्षित तथा ऐश्वर्या राय बच्चनको करियरको सम्झनलायक फिल्ममा यो फिल्म पनि जोडिन्छ ।

फिल्मले जुलाई १२ मा रिलिजको १९ वर्ष पुरा गरेको छ । यही मौकामा अभिनेता शाहरुखले सामाजिक सञ्जालको माध्यमबाट आफ्ना फ्यान प्रति आभार व्यक्त गरेका छन् । उनले फिल्मको सुटिङ अवधिमा आफूले भोगेको एउटा जटिल समस्याको खुलासा गरेका छन् ।

‘मध्यरातसम्म काम गर्नु, बिहान चाँडै आउनु, सानदार माधुरी दीक्षित, सुन्दर ऐश्वर्या राय बच्चन र जहिल्यै खुशी रहने ज्याकी श्राफ, जीवनले भरिपूर्ण किरण खेर र भन्सालीको नेतृत्वमा काम गरिरहेको उत्कृष्ट टीमको कारण मेरो सबै समस्या सुल्झिए । तर एक समस्या सुल्झिएन–धोती जहिल्यै खुस्किन्थ्यो । प्रेमका लागि धन्यवाद’, उनले पोस्ट गरेका छन् ।

फिल्म सन् २००२ मा रिलिज भएको थियो । फिल्ममा शाहरुखले देवदास, माधुरीले चन्द्रमुखी र ऐश्वर्याले पारोको भूमिका निभाएका थिए । यो फिल्म शरत चन्द्र चट्टोपाध्यायको कालजयी उपन्यास ‘देवदास’माथि बनेको १४ औं फिल्म थियो ।