नुहाउँदा भिजेको कपाल सुख्खा पार्न हामी तौलियाले टाउको पुस्छौँ । लगतै कपाल सुख्खा हुन्छ पनि । तर यसरी कपडाले भिजेको कपाल पुछ्नासाथ कपाल सुक्छ कसरी ?

कपाल पुछ्दा सुक्नुमा सामान्य अर्थ हो, भिजेको कपालको पानी तौलियामा सर्छ र कपाल सुक्छ । तर कपालबाट रुमालमा पानी कसरी सर्छ त ? खासमा कपडाले टाउको पुछ्दा केशिकाकर्षणको माध्यमले पानी तौलियामा आउने गर्दछ । केशिकाकर्षणका कारण भिजेको कपालबाट पानी रुमालमा सर्न जान्छ ।

केशिकाकर्षण भनेको के हो ?

केशिकाकर्षण भनेको कुनै वस्तुलाई आफूतिर तान्ने प्रकृया हो । यसका लागि एउटा गिलासमा पानी भरेर त्यसमा एउटा पातलो नली डुबाइयो भने गिलासको पानी त्यो नली भएर माथितिर विस्तारै सर्दै जान्छ । अर्थात्, गिलासको पानीलाई शिशाको नलीको भित्ताले माथितिर तान्छ । यसरी कुनै पनि वस्तुले अर्को वस्तुलाई आफूतिर तान्ने प्रक्रियालाई नै वैज्ञानिकहरु केशिकाकर्षण भन्दछन् ।

केशिकाकर्षण नहुने हो भने, लालटीनमा सलेदो भएर मट्टीतेल माथि आएर बल्न सक्दैन । सुख्खा कागजले मसीलाई वा पानीलाई सोस्न सक्दैन । अझ महत्वपूर्ण रुखपातको जराबाट पानी माथितिर सोसिएर जान सक्दैन । यस्तै कपालमा कपडा दल्दा त्यहाँको पानी कपडामा आउँछ र कपाल सुक्छ ।