काठमाडौं– कोभिड–१९ को संक्रमणका कारण फिल्म निर्देशक तथा कलाकार विशारद बस्नेतको शुक्रबार निधन भएको छ । ललितपुरको मेडिसिटी अस्पतालमा उपचाररत उनको ३९ वर्षको उमेरमा साँझ निधन भएको हो ।

भारतमा जन्मिएका विराशद नेपाली फिल्म ‘मिष्टर भर्जिन’का निर्देशक हुन् । उनले फिल्म ‘यता न उता’को सह–निर्देशन गरेका थिए । बस्नेत नेपाल फिल्म एन्ड टेलिभिजन एकेडेमीका क्रिएटिभ निर्देशक समेत थिए ।

काठमाडौंको मीनभवनस्थित एभरेष्ट फिल्म एकेडेमीमा अभिनय पढाउने विशारदले असिम शाह निर्देशित फिल्म ‘दुई रुपैयाँ’, सुब्रत आचार्य निर्देशित फिल्म ‘सुश्री सम्पत्ति’लगायतका फिल्ममा अभिनय गरेका थिए ।

विशारदले चार महिना अघि मात्र बुवा र हजुरआमा गुमाएका थिए । उनको शुक्रबार नै पशुपतिमा अन्तिम संस्कार गरिएको छ ।