काठमाडौं– काठमाडौं उपत्यकामा आज (विहीबार) दिनभर झरी परिरह्यो । माघे झरीमा मस्त रमाउने भन्दा पनि ज्यान कमाउनेहरु बढी देखिए ।

कलेज जाने विद्यार्थी, कार्यालय जाने कर्मचारी लगायत गन्तव्यमा हिडेका बटुवाहरुको यो बाध्यता थियो । यही भीडमा केही रमाउनेहरु पनि थिए– उनीहरु सायद चन्द्रागिरि तथा फूल्चोकीको यात्रामा निस्किएको हुनुपर्छ– हिमपात हेर्न ।

यी काठमाडौंमा देखिएको दृश्य भएपनि विहीबार मुलुकभर वर्षा भयो, हिमाली क्षेत्रमा भारी हिमपात । पहाडी तथा तराईका जिल्लामा पनि पानीको प्रभाव देखियो ।

यता मौसम पूर्वानुमान महाशाखाका अनुसार विहीबारबाट तीनदिनसम्म पानी पर्नेछ । मंगलबार दिउँसो भित्रिएको पश्चिमी न्यूनचापीय वायुको प्रभावका कारण पानी परेको हो । वर्षा पश्चिमबाट वर्षा पूर्वतिर सर्दै जानेछ ।