नवलपरासी– अविरल वर्षापछि आएको बाढीले नवलपरासीपूर्व गैंडाकोटमा डाइभर्सन बगाउँदा अवरुद्ध पूर्वपश्चिम राजमार्गको नारायणगढ–बुटवल खण्डमा साना सवारी पास हुने गरी नयाँ डाइभर्सन बनाइएको छ ।

डाइभर्सन बनाएसँगै रोकिएका साना साना सवारी साधान चलाउन थालिएको इलाका प्रहरी कार्यालय गैँडाकोटले जनाएको छ ।

पुरानोलाई बनाउन समय लाग्ने भएकाले नयाँ डाइभर्सन बनाएर अलपत्र सवारीसाधनलाई सुचारु गरिएको इलाका प्रहरी कार्यालय गैँडाकोटकी प्रमुख प्रहरी निरीक्षक लक्ष्मी पाण्डे खनालले जानकारी दिइन् ।

ठूला सवारी साधन आवतजावत गर्नका लागि पुरानै डाइभर्सन मर्मत गर्नुपर्ने भएकाले शुक्रबारसम्म समय लाग्ने उनले बताइन् ।

हिजो बिहान आएको बाढीले सो सडकअन्तर्गत गैँडाकोटको २३ स्मृति पुल, हडबडे खोला, पितौजी पुलसहित चार स्थानको डाइभर्सन बगाएको थियो ।

सडक अवरुद्ध भएपछि पूर्वबाट पश्चिमतर्फ जाने सवारी साधनहरु गैँडाकोटमा नै रोकिएका थिए भने पूर्वतर्फ जाने सवारी साधनहरु डण्डामा रोकिएका थिए ।