तराईमा मुन्गा, सहजन नामले चिनिने तरकारी जसलाई सजिउन पनि भनिन्छ यो खादाँ निकै स्वादिलो हुन्छ । रुखमा फल्ने यो तरकारीको पात, फूल र फल सबैको तरकारी खाने गरीन्छ ।

चमत्कारी वनस्पतिको श्रेणीमा पर्ने सजिउनको निरन्तर सेवनले अन्धोपना नियन्त्रण सहित अन्य धेरै रोगमा लाभ पुग्ने देखिएको छ । सजिउन प्राकृतिक गुणले भरिपूर्ण हुन्छ । यसमा धेरै प्रकारको औषधीय गुण हुने भएकाले यसको सेवनले धेरै रोगबाट मुक्त हुन सहयोग मिल्छ ।

सजिउनमा भिटामिन ’ए’ र ’बी’ पर्याप्त मात्रामा पाइन्छ । साथै यसमा भिटामिन ’सी’ समेत पाइन्छ । यसमा फलाम, प्रोटिन, फाइबर, क्याल्सियम, फोस्फोरस एवं खनिज तत्व पनि प्रचूर मात्रामा पाइन्छ । सजिउनको नियमित सेवनले रक्तअल्पता र आँखाको रोगबाट आराम पाउन सकिन्छ ।

सजिउन हेमाग्लोविन बढाउनमा सहायक र एन्टिबायोटिकको गुणले युक्त हुन्छ । मुख्यतः पेट सम्बन्धी सबै प्रकारका विकार उपचारमा सजिउन निकै उपयुक्त मानिन्छ । यसले पाचन क्रियालाई बलियो बनाउँछ ।

सजिउनको नियमित सेवनले कपाल र्झन समस्याबाट पनि मुक्ति पाइन्छ । गठिया र मोटाइले पीडितहरूका लागि त यो अमृत जस्तै छ । यो वायु नाशक समेत हो । साथै सजिउन खानाले बोसो कम हुन्छ । बोसो कम हूँदा मोटाइ कम हुन्छ, गठिया निको हुन्छ ।

सजिउनको सेवनले पीडा नाशकको काम समेत गर्छ । यसले सुन्निएको कम गर्छ । यसलाई वीर्यवर्द्धक समेत मानिन्छ । आयुर्वेदले यसलाई नपुंसकताको उपचारमा प्रभावकारी मानेको छ । आयुर्वेदका धेरै औषधि तयार गर्न सजिउनको जरो, बोक्रा, फूल, बीउ र फल उपयोग गरिन्छ ।