काठमाडौं – एक्सन स्टार निखिल उप्रेतीले ‘भैरव’ को सिक्वेलका रुपमा चलचित्र ‘आयो भैरव’ निर्माण गर्ने भएका छन् । खबरहबसँगको विशेष कुराकानीमा उनले सो फिल्म निर्माणको योजना रहेको खुलासा गरे ।

निखिल उप्रेतीको फिल्म ‘भैरव’ ले दर्शकबाट राम्रै प्रतिक्रिया बटुलेको थियो । यसैको सिक्वेलमा बन्ने फिल्ममा निखिलकै शीर्ष भूमिका रहनेछ । निखिलले फिल्म ‘भैरव’ मा निभाएको पात्रकै भूमिकामा यो फिल्म निर्माण गर्न लागेको खुलासा गरे । ‘यो फिल्ममा भैरव सरुवा भएर काठमाडौं आएको हुन्छ, फिल्मले वर्तमान राजनीतिक परिवेशलाई कथा बनाउनेछ,’ निखिलले बताए ।

यतिबेला फिल्मको कथामा काम भइरहेको उनले जानकारी दिए । चलचित्रमा अन्य कलाकार को हुने भन्ने भने अझै फाइनल भएको छैन । तर, फिल्मलाई प्राविधिक रुपमा पनि सशक्त बनाउन चाहेको उनले खुलाए । सबै कुरा मिलिसकेपछि मात्र चलचित्रको औपचारिक घोषणा हुने पनि उनले खबरहबलाई जानकारी गराए ।

फिल्ममा निखिलकै लेखन र निर्देशन पनि रहने फाइनल भइसकेको छ । केही प्राविधिक भने बलिउडबाट पनि ल्याउन सकिने उनले बताए ।