काठमाडौँ– नेकपा एमाले निकट विद्यार्थी सङ्गठन अनेरास्ववियुको केन्द्रीय टोली सिन्धुपाल्चोकको मेलम्चीका बाढी–पहिरो पीडितको उद्धार र राहतका त्यसतर्फ प्रस्थान गरेको छ ।

पार्टी केन्द्रीय कार्यालय, थापाथलीमा आज महासचिव ईश्वर पोखरेल र पार्टीका केन्द्रीय सदस्य एवं अनेरास्ववियुका इन्चार्ज खिमलाल भट्टराईले अनेरास्ववियुको टोलीलाई विदाइ गरेका छन् ।

अनेरास्ववियुका अध्यक्ष ऐन महरको नेतृत्वमा रहेको टोलीमा ८ स्वास्थ्यकर्मीसमेत रहेका छन् । राहत तथा उद्धार टोलीले पीडितलाई वितरण गर्न चामल, तेल, त्रिपाल, टेण्ट पनि लिएर गएको छ ।

मङ्गलबार राति अबिरल वर्षाका कारण मेलम्ची र हेलम्बु बजार डुबानका कारण सर्वसाधारण विस्थापित भएका छन् ।

महासचिव पोखरेलले एमालेका सम्पूर्ण नेता तथा कार्यकर्तालाई पीडितको राहत र उद्धारका लागि संगठित ढंगले सहयोग पुर्‍याउन र आफ्नो संगठित शक्तिलाई परिचालित गर्न आह्वान गरे ।